على هامش الانتخابات التشريعية…
على هامش الانتخابات التشريعية…
كتبها: د، وصفي بوعزاتي
بزاف ديال المؤثرات والمؤثرين خرجوا كيديروا حملات انتخابية على شكل «كولابوراصيون»، وبنفس الطريقة اللي كيخدموا بها مع المطاعم والمحلات التجارية. وحتى المقدمة ولات محفوظة: «في ظل تفحّصي للبرامج الانتخابية لمجموعة من الأحزاب السياسية، طاح بين يدي برنامج الحزب الفولاني… ولقيت بلي هو…»
نقطة أخرى، لي فنظري، خطيرة وخطيرة بزاف: داك التعبير ديال «هاد المرشح ولد البلاد». لاحظت هاد الشي خصوصاً عند مجموعة من المرشحين فطنجة؛
كيتقال “هذا طنجاوي ديالنا قح”، وبالمقابل كيتقدّم مرشح آخر على أنه «ماشي بحال هذاك ريفي من الحسيمة» أو من شي منطقة أخرى، وكأن الأصل ديالو تهمة خاصو يبرّرها!
هاد الأسلوب فيه تمييز واضح، وكايبيّن أن فكرة «الريفي» و«الجبلي» ما زالت معقّدة شي ناس.
آ الشرفا، طنجة هي عاصمة ديال الريف الكبير، وحنا قبل هاد الشي كامل مغاربة. اللي باغي يناقش المرشحين، يناقش كفاءتهم وبرامج أحزابهم وحصيلتهم؛ ماشي شجرة العائلة ديالهم.
أما اللي باغي يدخل للبرلمان وهو ما قادرش يتجاوز هاد العقد، فالأولى ليه يقلب على طبيب الامراض النفسية، و ماشي على مقعد بالرلمان.