بعد الضجة التي خلقتها “سرقة” فكرة الكاميرا الخفية التي يعرضها رشيد العلالي على القناة الثانية , هاهو الفنان جمال الشعيري صاحب الفكرة يكشف ل”سياسي.كوم” تفاصيل علاقته برامز جلال و فكرة “الماسك” وكيف تمت سرقة فكرته من الإعلامي في القناة الثانية على حد قوله .
قربنا شويا من المشكل ديالك مع رشيد العلالي و سرقة الفكرة ديالك وعرضها على “دوزيم” ؟
أولا كانت الفكرة في رمضان لي فات كنت عرضت الفكرة عليه ديال “كاميرا كاشي بالماسك” و هي خدمة كنت تانديرها حوالي عشرين عام , وتواصلت قبلها مع “رامز” عجباتو الفكرة , ليظر الأخير وهو يستعمل “الماسك” في برنامجه , قلت لرشيد العلالي هاهو رامز إستعمل الماسك ولكن قاليا أنا عندي حساسية مع الجمهور وخفت يلا يقولو أنني نقلت منو , ولكن شرحت ليه و قلت أنه كل واحد و ثقافتو و كل واحد و بلادو والماسك راه كان تايتخدم من الثمانينات ديال القرن الماضي .
بعد ذلك كان ليا لقاء مع رشيد هاد العام و بديت تانوجد معاه الفكرة , وهو بدا تايقلب على “بواط برود” لي هاتنتج لينا الفكرة , موراها جا عندي و قاليا أنه لقا المنتج و هانبدا نخدم معاهم و عندي الصور الفيديوهات التي توثق لذلك وهو المشروع لي عطاوه ل”دوزيم” وهو لي خداو عليه الدعم من القناة .
من بعد شكون لي تكلف بالبروجي …وشحال كان المقابل المادي للعمل ديالك ؟
فالأخير أنا تفاجئت أنهم نسقو مع واحد الخبير من فرنسا , أما بالنسبة للمقابل المادي فأنا خديت فقط الأتعاب ديالي لي هي قليلة , ومن جهتي ماكانش الهم ديالي هو المقابل المادي بقدر ما كان الهم ديالي هو أنني نعرض العمل ديالي للمشاهد المغربي وأن واحد مغربي قضا تجربته في الدول الأوروبية يعرض العمل ديالو الإبداعي على المشاهد المغربي .
وحسيت ب”الحكرة” و إستغربت لما قاله لي بعد ذلك وأن شركة الإنتاج ماعجبهاش العمل ديالك إذن علاش تدفع المشروع للقناة ؟
شنو الطلب ديالك بعد هاد الضجة لي تدارت عبر مواقع التواصل الإجتماعي ؟
أنا بغيت غير نبيين للرأي العام أن فكرة “كاميرا كاشي” لي تايعرضها رشيد العلالي أن الفكرة ماشي ديالو , والفكرة و الإعداد ديالي و يحاول “إستحمار” الشعب المغربي وهذا أمر غير مقبول بالمرة .
بالنسبة لرواد للمهتمين بالملف تايتساءلو واش غادي تكون شي متابعة قضائية لرشيد العلالي ؟
طبعا غادي تكون , وغادي نعرض كل الإثباتات لي عندي وغادي نقدم شكاية للجهات المعنية بحكم أنني مانقدرش نخلي المجهود ديالي ويمشي هاكداك .