عمر محمود كان ممدود
فنجان بدون سكر:
زجليات عبدو:
عمر محمود كان ممدود
بقلم عبدالهادي بريويك
ما نشرب الا من راس العين
نكون مومن أو زهواني
الخالق يدو ممدودة
وانا ديما غيواني
واش البرقوق هو المشماش
واش الكاس
يتسمى كاس دون صواني
فيق البراد
وتعلم مني لمعاني
عشت كاس فرادي
نكتب وبقلمي نشالي
لا حد قدر كلامي
ولا حد فهم سر لمعاني
جود يا الموجود
باش ما بغيتي تجود
سلمتك أمري
وفيك رجاي المعبود
خليني
نضحك شوية على يامي
ونرش ما زهر على القوافي
نكتب ونجول
وعمر كلامي كان محلوب
في الدنيا عايش مجذوب
كنبغي ثقولية
وعمري كنت مزروب
واش عمرك شفتي
زواج الصدق والكذوب؟
واش عمرك شفتي
زواج الغاضب والمغصوب
واش الصحيح
هو المعطوب؟؟؟
الطبل مايحس
ومولاه طبال
واش ولد لوزير
بحال ولد الزبال
شالا كلام
وفي الشوارع
أطفال وبنات وصبيان
لا مدرسة تحميهم
لا قانون يحميهم
لا عليهم سلام ولا كلام
تسالات القصة
مع هل لمكان
واش زمان بكري
هو هد زمان
فين ضاع بين هد الفوضى
روح الانسان
كلامي كلام صغير
(ستيتو )
وقصير
فيه حب لبلاد
فيه ريحة الناس
وفيه ناس
من روح خيالي
عمر الساݣية
قنطت من دراري
تخلطت الدمعة بالضحكة
وتخلطت علي الهموم
وقع لي بحال الغياط
يجمع السوفل والريح
باش يرقص الجماهير
يرقصو ويمشيو
وينعسو على لحرير
والغياط ليه الله والحصير
شنو الفرق
بين العمى والبصير
وكلشي باغي التغيير