مابغينا والو ..

زجليات عبدو
مابغينا والو ..

بقلم عبدالهادي بريويك

بغينا غير نعيشوا بخير في بلادنا
ونذوقو من عسل خيراتنا
وفي بلادنا نعيشو حياتنا
مابغينا والو
بغينا قلوب رحيمة تهتم ببنات وولاد لبلاد
وعقول ماتهدم الخيمة ولا تسرق اوتاد
ويتبخو احلامنا على لعواد
بغينا مسؤولين يحسوا بالعباد
يمسحو دمعة المظلوم
دمعة الحزين
ويعطيو حق الضايع
واليتيم
ويخرجونا من لخواض
مابغينا والو
بغينا غير سفينة لبلاد تمشي وتزيد
بقلوب صافية
وضمائر حية
ونعيشوا بكرامة
وبكل اعتزاز بالمواطنة

بغينا الوطنية ..بغينا الشهامة ..
بغينا المروءة..بغينا الحنكة والكفاءة
مابغينا والو
غير ندوقو من دقيق الثروة
حتى حنا عندنا حاسة الذوق
وكنحسو بالبنة
نسكنو بحال الناس
وماشي أقل من الناس
ونخرجو من هد المحنة
بلا رشوة بلا دهنة
مابغينا والو
بغينا اليوم
اللي يخرج لبلاد من هد الزحمة
خليو في قلبكم شوية الرحمة
ها الملايير مشات لهيه وهنا
وحنا هم حنا
لا قلوب رحيمة في الصفقات
ولا هم على البلاد
ماكين غير هدم الخيمة
وفرق لوتاد
بغينا غير لي يسرع بالعجلة
ويبقى في التاريخ
يذكروه لجواد
مابغينا والو
بغينا غير اللي يمسح كلمة الكميلة والقهيوة
هذ
راها بلاد ماشي كرويلة
بلاد محتاجة ماليها
العارفين ما بها
واش فيها
ماشي التعديل يبقى واش
تبدل فريد بفريدة
ولا عبدالفاشل بعبد الصبور
ولا الميت بحفار لقبور
بغينا نعيشو
قبل راه نقبنا زمان
وبقينا بين نسور

Get real time updates directly on you device, subscribe now.

اترك رد

لن يتم نشر عنوان بريدك الإلكتروني.

*