إلى الأخ الأمين العام لحزب الاستقلال اللي باغي يلهم شباب “z”..
### على مسؤوليتي
رقم 2
إلى الأخ الأمين العام اللي باغي يلهم شباب “z”..
بصراحة، واش نسيتي شنو درتو فالحزب؟
فـ زمنكم تقتلات الديمقراطية الداخلية اللي كانت تاج حزب الاستقلال منذ تأسيسو.
فـ زمنكم الشبيبة الاستقلالية ولات بحال إطار بلا روح، ، لا نقاش، لا نفس نضالي، فقط صمت وولاءات و ديكور بلا مواقف.
فـ زمنكم تسدّات الأبواب فوجه المناضلين اللي خدمو الحزب بعرقهم، وتحلّات فوجه تجار الانتخابات والبارونات اللي ما عمرهم آمنو بالفكر الاستقلالي على حساب الشرفاء الذين صنعو مجد هذا الحزب.
فـ زمنكم وصلو للوزارة ناس ما عندهم حتى علاقة بالحزب، والمناصب العليا توزّعات على المحظوظين والمقربين، وكأن الحزب ورث خاص! ولم يعد لنضال اي معيار.
واليوم، كتخدمو بصمت باش تفرشو الطريق بالورود لعبد المجيد الفاسي ياخذ الأمانة العامة من بعدكم…
واش حزب الاستقلال ولى شركة عائلية؟
واش التاريخ ديال المجاهدين والوطنين بحال علال الفاسي وأحمد بلافريج وعبد الكريم غلاب ولى إرث عائلي كتورثوه بيناتكم؟
شنو غادي تقول لشباب المغرب؟
شنو الأمل اللي غادي تعطي لجيل “z” اللي خرج للشارع كيطالب بالكرامة وبالعدل وبمستقبل؟
كيفاش غادي تلهمهم وانت اللي قتلت الأمل داخل الحزب قبل ما يتكلم الشارع؟
بكل وضوح، ومسؤولية
راه حزب الاستقلال أكبر منك، وأكبر من أي واحد باغي يحوّلو إلى ضيعة عائلية!
الحزب ديال الشرفاء والوطنين ما غاديش يموت، لكن التاريخ غادي يسجّل الأسماء اللي باعوه بأبخس الأثمان.
يتبع
يوسف أبطوي
عضو اللجنة التنفيذية السابق
