هاذ صاحب الصورة.. هو وزير الصحة ديالنا.. نعام آ سيدي.. هذا هو معالي وزير الصحة والحماية..

كتبها: مصطفى العسري

هاذ صاحب الصورة.. هو وزير الصحة ديالنا.. نعام آ سيدي.. هذا هو معالي وزير الصحة والحماية..

والله ما كنت عارفو.. ودابا والله ما عارف سميتو.. ولا كنيتو.. 

علاش هو وزير.. وفي نفس الوقت نكرة.. 

لأن أغلبية وزراء حكومة أخنوش هما هكذا يتحاشون الأضواء وكيموتو على السترة.. ومدورين بهم شي ناس ما تعرفهم مستشارين ولا مديري الدواوين ولا فيدورات.. هما لي كيتحكمو في الوزراء وهما ليكيختارو ليهم الصحافيين لي غيتكلمو معاهم.. أي بالعربية تعرابت صحافيين تحت المقاس ووسائل اعلام تحت المقاس.. 

خلافا لوزراء الحكومات السابقة، الإدارية واليسارية واليمينية والإسلامية.. كانوا معروفين.. جايين مكفضين من ساحات النضال.. وعندهم باكاج سياسي وحزبي ونضالي.. انت تخرج عينك فيه.. وهو كيخرج عينو فيك.. وربما يخرج كشاكشو من فمو ونيفو.. ويقدر يتهاز معاك بكل احترام.. لأنه حافظ صواريه.. 

أما الوزراء الحاليين، فأغلبهم ما عرفينش منين قطر بهم السقف.. وأغلبهم جايين من شركات وهولدينغات.. لا علاقة لهم بالشعب وبصحافة الشعب وحالة طقس الشعب، ما كيخرجو لوزاراتهم .. حتى يشوفو الأخبار الجهوية.. لكن في “فرانس 3” وحالة الطقس ديال قناة BFM .. وبالتالي لا علاقة لهم بأوضاع هاذ الشعب ومشاكل هاذ الشعب .. ونهار كيطيحو في شي مشكيل ولا أزمة بحال أزمة مستشفى أكادير.. الوزير كيتخبى.. وكيشد راسو.. ويقول آش داني لهاد الصداع ولهاذ المشاكل.. 

وحلها يا من وحلتيها..