على الحكومة أن تخصص ميزانية إضافية من ميزانية الدولة لشراء السكاتات واللهايات للجم المعارضة

وفي رواية أخرى:

على الحكومة أن تخصص ميزانية إضافية من ميزانية الدولة لشراء السكاتات واللهايات للجم المعارضة البرلمانية:

عبد الهادي بريويك 

يا سلام على رئيس الحكومة ديالنا! باين عليه باقي ما كملش مشروع “دار الحضانة الوطنية”، و يخصّص من ميزانية الدولة شي اعتماد مهم باش يشري لينا سكاتات ولا لهايات، باش يسكتنا كاملين! يسكت صوت المعارضة والصوت ديال الشعب؟ لا لا، خاصنا هاد السكاتات باش ما يبقاش حد يزعج السيد الكبير.

الرجل شاد المازوط والما والدواء والأوكسيجين ديال السبيطارات ويعلم الله آش كاين آخر ، وبقا ما كيتحمل حتى كلمة نقد.

ولاّ كيشوف راسو مول دار الحضانة، خاصو “سكاتات” باش يهدّي لنا راسنا كاملين.

في آخر جلسة برلمانية، ما جاوبناش على أي سؤال، لا لا، خرج علينا بتهديد ما شفتوش من قبل: “إلا ما سكتوش المعارضة، غنوقفو الاستثمار.” يعني بالعربية الدارجة، “صافي بغيتكم تسكتو، ولا غنمشي نسد الروبيني على الفلوس حيث المستثمرين معظمهم صحابو وكديرو بحسابو”.

واش حنا ولاد صغار؟ واش غنرضاو نديرو في راسنا “بابا يعطيني سكاتة”؟! هاد السيد ما لقى ما يقول، باغي يدير لينا حديقة أطفال كبيرة، وينسينا أننا مواطنين وعندنا الحق نعبرو ونهدرو وننتقدو.

هذي ماشي غير قفز على الدستور ولا على المشروع التنموي اللي كيتكلم على المشاركة والحوار. لا لا، هاد السيد باغي يعاود يربينا بحال ولاد صغار فالحضانة، باش ما نخرجوش نهدرو بزاف.

فين ديموقراطيتنا؟ فين الحوار؟ ولا بقات العصا والتهديدات هي اللغة الرسمية؟ الشعب بغى صوتو يسمعوه، والمعارضة خاصها البرلمان ماشي “دار الحضانة” اللي دارها لينا رئيس الحكومة بتهديداتو الغريبة.

راه الاقتصاد وكرامة الناس ماشي لعبة فميدان اللعب السياسي، راه حتى الاستثمارات ولاّت ورقة ضغط باش نسكتو، وسكاتة.. 

الله يعطينا الصبر مع هد الحكومة !