فضيحة : مكتب الخليع يعرض المواطنين للخطر ب”الخلاء”….وزبون يحكي يوما أسود فONCF
سياسي : كازا
في رسالة مؤثرة وجها أحد زبناء ترانات الخليع و التي كادت تسبب له في كارثة دراسية بسبب تأخرها وجد نفسه في “الخلاء” ولا وحشا يسير ولا طيرا يطير و عرضت حياة الراكبين للخطر بين مدينتي الجديدة و الدار البيضاء , علما أن إدارة المكتب الوطني لسكك الحديدية كانت تعلم بالمشكل .
وقال الزبون في تدوينة عبر حسابه :
يوم أسود مع ONCF
اليوم كان عندي امتحان في كلية الطب و الصيدلة في الدارالبيضاء مع 11h ديال الصباح فوحدة من بين أهم المواد ديال المسار الطبي (la pédiatrie ) و لي كتحتاج وقت طويل ديال القرايا و السهر حتى نصاصة ديال الليل باش تقدر تكمل العشرات ديال الدروس لي كاينين فيها….
باش نجي ندوز الامتحان خديت طران من الجديدة مع 7h22 و لي كان خاصوا اوصل الكازا مع 8h35 …خديت ديال 7h واخا كازا قريبة حينت عارف طرانات ديالنا كيديرو الروطار…و بغيت نوصل لكازا قبل 2h30 من الامتحان نراجع فيها شوية حينت داكشي كثير كيتنسا….
مع 7h50 طران طفا وسط لخلا….وقف عن العمل…و بقينا گالسين أكثر من 30 دقيقة معارفينش شنو واقع بلا مايدوي معانا حتى مسؤول
شويا الناس لي كانو في مقطورة Wagon الثانية خرجوا كيغوتو ……تبعناهم كاملين و لقينا الطران كيسيل من التحت و كيطلق الدخان و ريحت الحراق…. و أكدوا على أن الريحة شموها من الجديدة و لكن كانت خفيفة و دابا تجهدات بزاف و حسوا بالاختناق و خافوا على راسهم….من بعد كيخبرنا contrôleur أن الطران فعلا خسر و خاسنا نتسناوهم اجيو اصيبوه…..و حنا وسط الخلا و أنا باقي ليا 2h على امتحان قريت ليه أسابيع و سهرت عليه ليالي….كنعيط لدارنا ناعسين و التليفون silencieux
بقاو الناس كيحتجوا و كيصورو و گالسين فوق السكة و أنا معرفت مندير وسط هاد الخلا و هاد الحصلة…. وملي عرفت القضية بدات كتحماض هزيت حواجي و الباليزا و بديت غادي فهاداك الخلا بحال الهبيل و شتا كتصب عليا كنقلب على شي حد اديني الكازا و لا شي دوار فيه الطاكسيات….درت GPS لقيتنا قراب شويا لاثنين شتوكا…تمشيت 25 دقيقة وسط التراب والشتا حتى وصلت المحطة ديال ONCF ديال اثنين اشتوكة….لقيتها دايرا بحال شي دار مهجورة و جات وسط الحقول و الغنم…. في طريق عيط ليا بابا و شرحتلو گالي غادي اطير اجي
سولت شي فلاحة و وراوني طريق السونطر ديال اثنين الشتوكا و تمشيت فهاداك التراب و الغيص حتى وصلت “المدينة”…..بقيت كتنسنا فبابا وصل عندي مع 10h05 عاد شدينا طريق لكازا و صلت قبل الامتحان ب 10 دقائق…دخلت و الأستاذ سد الباب.
أنا بعدا وصلت….واخا وصلت مكرفص و حالتي حالة و فيا البكية و الغضبة و stress…حينت كنشوف راسي غادي نضيع في امتحان هاكاك…و كنشوف كيفاش هاد الدولة مكتعتابرش المواطنين….بحالا حنا معدنا ميادار و بغينا نمشيو في طران ديال 7h20 نهار رمضان….راه كل واحد شد هاداك طران كان عندو غاراض…خدمة امتحان entretient مطار….و كلشي تعطل على الشغل ديالوا حينت طران كان خاسر أصلا من الجديدة و رغم ذلك قطعوا لينا التذاكر و سيفطونا فيه…باش نلقاو راسنا محبوسين وسط الخلا و معدنا حتى فين نتخباو على الشتا
وتم تداول التدوينة على نطاق واسع بين رواد الفيسبوك موجهين سهامهم لمكتب الخليع , ومنتقدين الترانات و أن الأمر ليس الأول من نوعه بل هذه المرة هي واحدة ضمن مئات المرات .
وجدير بالذكر أن مكتب الخليع لا يكترث بالمواطنين دون تقديم أي توضيح أو إعتذار للمواطنين الذين يعدون المتضرر الوحيد من هذه التصرفات “اللامسؤولة” من المكتب .