أوزين: حنا ما غاديش نقولو للمواطن: عطينا صوتك حيث حنا الحركة الشعبية. غادي نقولو ليه: شوف البرنامج ديالنا. شوف المواقف ديالنا. شوف شنو دافعنا عليه. شوف شنو اقترحنا. ومن بعد حكم علينا.
سياسي: متابعة
قال الأمين العام لحزب الحركة الشعبية محمد اوزين، اليوم بمدينة فاس، ان فاس المدينة اللي كيتشرف العبد الضعيف بالانتماء لجهتها. وما بين فاس وإفران وواد افران عشق كبير ورابطة قوية ديال الأخوة مبنية على حب المغرب.
واضاف اوزين” خاصنا نشوفو فاس من خلال الحاضر ديالها، ومن خلال الأسئلة اللي كيطْرحها المستقبل ديالها. وهاد الشي هو علاش جينا اليوم جينا باش نهضرو معاكم بصراحة، نسمعو ليكم، ونقولو ليكم حتى حنا شنو كنشوفو، وشنو كنقترحو، وشنو بغينا نبدلو، حيت السياسة عندنا ماشي هي غير تهضر من فوق المنصة وتمشي. السياسة هي أنك تسمع للمواطن.
واضاف اوزين” والسياسة هي أنك تدخل للأحياء، للمدينة العتيقة، للمناطق الهامشية، للجامعة، للأسواق، للمعامل، للورشات، وللجماعات القروية المحيطة بالمدينة.السياسة هي أنك تعرف فين كاين المشكل قبل ما تقدم الحل.
وقال اوزين” فاس كتحتاج ماشي غير مشاريع متفرقة، ولكن محتاجة لتصور متكامل كيخلي المدينة تسترجع والدور الاقتصادي والثقافي والاجتماعي اللي كيليق بها.من بين أكبر المشاكل اللي كيعاني منها المواطن في فاس ككل مدن وقرى المغرب … كاين مشكل الشغل.
الشباب كيقرا، كيتخرج، كيدوز السنوات، ومن بعد كيلقى راسو قدام البطالة أو ما يشبه الخدمة باش يديباني أو الانتظار.
وابرز اوزين” جا الوقت باش المدينة اللي عندها جامعة بحال جامعة سيدي محمد بن عبد الله، ومؤسسات تكوين وكفاءات، تربط التعليم بسوق الشغل، وتخلق اقتصاد جديد مبني على المعرفة والابتكار والخدمات والصناعة والمهن الجديدة.جا الوقت باش نستافدو من الجامعة، ماشي غير كمؤسسة للتدريس، ولكن كمحرك للتنمية.وجا الوقت باش نعطيو للشباب ديال فاس فضاءات حقيقية للمقاولة والابتكار، ونقربو التمويل والتكوين والمواكبة من الشباب اللي عندو فكرة وباغي يحولها لمشروع.
