رسالة للسي شباعتو، زعيم المعارضة ف مجلس جهة درعة-تافيلالت.

رسالة للسي شباعتو، زعيم المعارضة ف مجلس جهة درعة-تافيلالت.

عبد الواحد درويش

تحية وسلام و
ⴰⵙⴳⵯⴰⵙ ⵉⵖⵓⴷⴰⵏ.

السي شباعتو المحترم،

كيف ما راسلنا لبارح السيد الرايس ديال جهة درعة-تافيلالت، السي لحبيب شوباني، ها حنا ليوم كنصيفطو ليك بدورك هاد الرسالة، لاعلا وعسى تسمعنا هاد المرة، من بعدما وقع للي وقع في الإنتخابات الجزئية ديال دائرة الراشيدية وللي فاز بيها الشاب حميد نوغو.

السي شباعتو المحترم،

الشاب حميد نوغو، ومعه آلاف الشباب والشابات، تمكنو من كردعة المرشح ديال حزب الأحرار كيفما كردعو المرشح ديال البيجيدي. ولابد لا السي شوباني كرئيس ديال جهة درعة-تافيلالت ولا نتا كزعيم ديال المعارضة في مجلس الجهة ما تستخلصو الدروس من هاد الشي للي وقع ..

السي شباعتو المحترم،

نتا كنتي خبير لدى المجلس الوطني للشباب والمستقبل في بدايات 1990. وموراها ولليتي نائب برلماني بإسم الحركة الوطنية الشعبية ديال المرحوم محجوبي أحرضان، وطلعتي وزير ديال الصيد البحري ف 1998 تم وزير منتدب ديال المياه والغابات بإسم نفس الحزب. من بعد غادرتي حركة أحرضان والتحقتي بالاتحاد الإشتراكي وترأستي لمدة ولايتين ونصف مجلس جهة مكناس-تافيلالت بإسم نفس الحزب. وف يونيو 2015، قبل الإنتخابات الجماعية والجهوية، غادرتي الإتحاد الإشتراكي ومشيتي للتجمع الوطني للأحرار للي صبحتي بسميتو نائب برلماني وعضو ف مجلس جهة درعة-تافيلالت.

السي شباعتو المحترم،

نتا ليوم، الله يطول عمرك، كتبلغ ف السن أكثر من 70 سنة، دوزتي النصف ديال حياتك السياسية ونتا كتهضر على الشباب ومستقبل الشباب وتشغيل الشباب وتشجيع الشباب للانخراط ف السياسة.. إلخ إلخ إلخ..

لكن مللي تشجع واحد الشاب سميتو حميد نوغو، وهو مقاول شاب طموح ومكون تكوين جامعي، وترشح للإنتخابات الجزئية ف الراشيدية، نضتي كمنسق جهوي ديال حزب الأحرار ف جهة درعة-تافيلالت ورشحتي ضدو واحد النائب برلماني سابق، بحالك كيبلغ ف العمر أكثر من 70 سنة.. وهاد الشي كوللو باش ينافس الشاب حميد نوغو على ود مقعد ديال 5 شهور ف مجلس النواب..

الله أودي آ السي شباعتو، الرجوع لله.. وراه ما شي هاد الشي للي كنتي كتقول مللي كنتي خبير ف المجلس الوطني للشباب والمستقبل هادي أكثر من 30 سنة.. !!!

الحاصول، راه الوقت تبدلات آ السي شباعتو، والشباب ليوم قالو كلمتهوم ف الانتخابات الجزئية بالراشيدية ديال 07 يناير، وغادي يقولوها بقوة أكثر ف الانتخابات المقبلة ف يونيو..

السي شباعتو المحترم،

قبل ما نختمو هاد الرسالة، بغينا نقولو ليك ما يلي:
– راه الناس ديال الراشيدية حاسبوكوم سياسيا وانتخابيا، نتا والسي الشوباني، وكيقولو ليكوم بجوج : الله يجعل البركة.. راكم قضيتو لغاراض، وللي كلا وشبع، يخوي التيران..

هدا ما كان.

ونتمناو ما تقلقش بززاف، وترجع لداك الشي للي كنتي كتقول على الشباب.. والمستقبل.. حيت المستقبل راه هو اليوم وغدا..

إوا آ السي شباعتو، خلليناكم على خير، نتا والسي الشوباني.. وحتا نتلاقو ف شي مناسبة، غادي نقول ليكوم آش قال واحد أمدياز/شاعر أمازيغي على الشيوخ والسياسية .. 🤔