– إيوا شفتي؟ ياك قلتها لك.
كتبها: احمد الدافري
– إيوا شفتي؟ ياك قلتها لك.
+ شنو قلتي لي؟.
– قلت لك الميريكان ما غادياش تبقى ساكتة. وغاديا تدخل تعاون صحيبتها.
+ أوّلا حيد عليا السبسي وبخ الدخان ديال الكيف لهيه. راك عارفني مريض والدخان كيهلكني فصحتي.
ثانيا ما عمرك قلتي لي هاذ الهضرة.
كنتي كتقول ترامب ما يقدرش يدخل للحرب حيت عارف راسو إذا دخل ليها ما غاديش يخرج منها وغادي ياكل الدق مزيان.
– إيوا هانتا قلتيها.
الدخان ديال الكيف ما كتقدرش عليه.
كيزعزع لك دماغك.
وا راه قلت لك غادي يتفاهم مع روسيا والصين وفرنسا والإنجليز. غاديين يتفاهمو بيناتهم. وهو غادي يتكلف بالنووي.
+ وا صاحبي أنا مزاوك فيك حتى تسقط الكيف من السبسي عاد هضر. راه النووي هو هذا للي كتسيفطو لي دابا مباشرة لصدري.
أو غادي نوض بحالي.
بالناقص من هاذ القهوة معك.
– صافي أسيدي. ها هو غادي يسقط السبسي فالكاس ديال الما عاد غادي يهضر.
غير ما تتقلقش أصاحبي.
شفتي السقطة كيدايرا؟
كتصوط صوطة وحدة.
غير بالعقل.
بلا ما تستخدم الجهد.
نفخة وحدة.
فط.
والسقطة كتطير من الشقف بحال شي صاروخ وكتمشي نيشان للهدف.
+ تبارك الله عليك.
متحكم مزيان فالمنصة، وعارف مزيان الإحداثيات ديال الهدف.
– الخبرة أصاحبي.
والله ما كنتي قاري مزيان ومتمكن من الميدان ما تجيبها نيشان وسط الكاس ديال الما.
وا قل تاني ما قلتش لك بللي هاذ الحرب غير مسرحية.
+ إمتى قلتيها لي؟
– وايلي أصاحبي.
خصك تنوض تبالي براسك واقيلا ولى فيك الزهايمر.
قلتها لك نهار اسماعيل هنية طحنوه وهو فالأوطيل.
+ ما عقلتش.
ولكن شنو دخل هنية للحرب للي قلتي بأنك قلتي لي راها غير مسرحية؟
– بلاتي نشعل….
شوف…
هنية كان تعشى فالأوطيل مع واحد القائد عسكري ديال الحوتيين.
تعشاو بالحوت.
وهاذاك الحوت كان فيه السم.
وملي سالا الاجتماع ودخل للبيت ديالو فالأوطيل، بقى كيغوث وكيتلوى بالحريق.
عيطو على لومبيلونص.
ملي وصلت كان مول الأمانة دا أمانتو.
وباش ما يعيق حد بللي هوما للي سالاو معاه دارو خطة. ملي عاقو بيه ما بقاش كيدير بكلامهم، وولى كيدير للي فراسو، دارو ليه السم فالحوت ملي كان كيتفق مع الحوتي بلا خبارهم، وصفاوها ليه وهو معهم، ومن بعد طلقو عليه صاروخ من واحد المنصة قريبة من الأوطيل.
الدقة فركتاتو .
وقالو لك آسيدي، آه حقا ما حقا، راه الصاروخ جا من تل أبيب.
زعما احنا حمير.
+ اسمح لي. هاذ القصة ما عمري سمعتها من عندك.
إيوا زيد؟
– وزيد انتا من عندك.
القضية راها باينة.
+ ما باينة والو.
بلاتي ما تشعلش عافاك.
تكايس أصاحبي عليا من الدخان، وانتا ما كاين غير صاروخ من مور صاروخ.
خلي المطوي والشقف يرتاحو شوية.
– ههه. انت عندك الدماغ ديال الحوتة.
كتتحشش غير بالدخان.
على ذيك الشي ما بانتش لك القضية كيدايرا.
الله يجيبك على خير.
وا راهم كاملين متفقين.
واش تدخل لك فراسك دولة عندها النووي وعندها الصوارخ كيطيرو ثلثالاف كيلومتر فالسما وكيطيحو على العمارات، ورئيس ديالها كان راكب فإيليكوبطير مخرششة وطاحت بيه فغابة، وشحال وهوما كيقلبو عليه، عاد لقاوه مرمي بين الشجر مقطع طراف؟
ههه.
هاذ الخرايف يمشيو يعاودوهم لشي واحد آخور للي مكلخ.
+ وا باز أصاحبي.
– علاش باز؟
+ باز لك منين كيطيحو عليك هاذ الأفكار.
– هذا آ الشريف كيتسمى الجيوبوليتيك.
وماشي غير آجي وكن كتفهم فيه.
وماشي غير آجي وكن عارف شنو الماسونية كتخطط للعالم قبل ما تسيفط علينا المسيح الدجال الأعور.
+ والله أسيدي حتى بلاصتك ماشي هنا فالقهوة د الجلدة. بلاصتك فشي قناة عالمية.
برافو عليك.
كحكح كحكحكح.
ناري. خنقتيني.
وهذا ما كان.