علاش الكازوال نقص غير بـ 20 سنتيم؟ الحقيقة الكاملة
علاش الكازوال نقص غير بـ 20 سنتيم؟ الحقيقة الكاملة
كتبها: سفيان خليهن
بزاف ديال الناس كيسولو: “علاش النفط طاح في العالم، وحنا في المغرب الكازوال نقص غير بـ 20 سنتيم؟”
الحكومة ما كتصنعش ثمن الكازوال.
الحكومة ما كتبيعش الكازوال. الثمن كيتصنع في السوق العالمي.
واللي كيقول العكس، إما ما فاهمش، أو كيبغي يركب على غضب الناس.
أولا: شنو وقع في العالم؟
في العالم، النفط الخام طاح، صحيح.
من 136 دولار في 8 أكتوبر، لـ 93 دولار في 13 نونبر. طاح بـ 32%.
ولكن حنا في المغرب، ما كنشريوش النفط الخام. كنشريو الكازوال واجد، مكرر، جاهز.
وثمن الكازوال في العالم ما طاحش بحال النفط.
من 202 دولار لـ 180 دولار. يعني طاح غير بـ 11%.
وعلاش؟ حيت المصافي العالمية مضروبة. الحرب ضربت المصافي في روسيا والشرق الأوسط. المخزون العالمي ديال الكازوال ناقص بـ 13%. صادرات الكازوال ناقصة بـ 1,3 مليون برميل في اليوم.
وكالة الطاقة الدولية قالتها بوضوح: المشكلة ماشي في النفط، المشكلة في التكرير.
يعني الحكومة المغربية ما عندها حتى علاقة بهاد المشكل. هادا مشكل عالمي، كتعاني منو أمريكا، وأوروبا، وكل دول العالم.
في أمريكا، الكازوال باقي بـ 6,06 دولار للغالون، وهو من أغلى الأثمنة في تاريخهم. وفي أوروبا، الكازوال باقي 77% فوق الثمن ديالو قبل الحرب.
واش أمريكا وأوروبا تا هما الحكومة ديالهم هي السبب؟ لا. هادا سوق عالمي.
ثانيا: شنو دارت الحكومة المغربية؟
الحكومة، كانت واضحة وشفافة مع المغاربة.
يوم السبت، في البرلمان، الوزير قالها قبل ما توقع: “الانخفاض العالمي غادي يبان في المحطات ابتداء من 16 نونبر”.
وفعلا، يوم الاثنين 16 نونبر، غادي وقع الانخفاض.
الكازوال نقص بـ 20 سنتيم عند أفريقيا وشل، وبـ 29 سنتيم عند طوطال. والبنزين نقص بـ 50 سنتيم، وبـ 61 سنتيم عند طوطال.
يعني الحكومة ما كذباتش، وما خباتش. قالت التاريخ، ووقع الانخفاض في نفس التاريخ.
واش هادا كان ممكن يوقع بلا متابعة يومية من الحكومة للسوق العالمي؟ لا.
ثالثا: علاش 20 سنتيم فقط؟ 4 أسباب موضوعية
1. حنا كنشريو بالدولار، وكنبيعو بالدرهم.
إلا طلع الدولار، الثمن كيبقى طالع وخا النفط نزل. هادا ماشي قرار الحكومة، هادا سوق الصرف العالمي.
2. المخزون القديم.
الشركات شرات الكازوال قبل 15 يوم بثمن غالي. ما يمكنش تبيعو غدا بثمن رخيص وتخسر. هادا منطق تجاري عالمي، ماشي في المغرب فقط. والتحيين في المغرب كيدار كل 15 يوم، لهذا الانخفاض كيبان معطل.
3. الضرائب ثابتة.
جزء كبير من الثمن اللي كتخلص، هو ضريبة كتمشي للدولة، باش تبني الطرقان، والمدارس، والمستشفيات، وتخلص الدعم الاجتماعي. هاد الضريبة ما كتنقصش مني كينقص النفط. وهادا معمول به في كل دول العالم.
4. الكازوال ماشي هو البنزين.
البنزين نقص بـ 50 سنتيم، حيت السوق ديالو مرخوفة. الكازوال عليه الضغط العالمي: الشاحنات، الفلاحة، النقل، التدفئة في الشتاء. لهذا في العالم كامل، الكازوال نزل شوية، والبنزين نزل أكثر. المغرب غير تبع السوق العالمي.
رابعا: الحكومة كتفكر في المواطن، ماشي في الشركات
وهنا بغيت نقولها بوضوح:.
والحكومة تا هي كتخلص فاتورة غالية: فاتورة واردات الكازوال وصلت لـ 50,7 مليار درهم حتى لغشت 2026، بزيادة 44,9%. يعني الدولة تا هي كتعاني من الغلاء العالمي، بحال المواطن.
الخلاصة: لا تظلموا الحكومة
أنا كنقولها بكل مسؤولية:
الحكومة ما خلقاتش أزمة الكازوال. الأزمة خلقاتها الحرب، وضربات المصافي، ونقص الإنتاج العالمي.
الحكومة ما زادتتش في الثمن. الثمن زاد في روتردام، وفي السوق العالمي.
20 سنتيم، هي بداية الانخفاض، ماشي نهايتو.
إلا استمر الانخفاض العالمي، غادي يستمر الانخفاض في المغرب. هادا هو المنطق ديال السوق.
خاصنا نكونو منصفين. مني الثمن كيطلع، كنقولو الحكومة هي السبب. ومني كينزل، كنقولو 20 سنتيم قليلة.
الإنصاف هو أننا نعترفو بلي الحكومة كتدير اللي عليها في سوق عالمي صعيب، ومعقد، وما كيتحكمش فيه حتى واحد.
وفي الاخير خصنا نفكرو في التسقيف هذا نقاش خصنا نبنو مصفاة ديالنا هذا نقاش خصنا نفكرو جميع فشي حل ممكن نعم ولكن باش نبقاو نتبعو بعض الاراء لي كتضرب ببلادنا وباغية دير مزايدات سياسية فهذا ماشي حل…