الاحتجاجات السلمية.. علاش لا؟؟؟

كتبها: عادل الزبيري

 

الاحتجاجات السلمية.. علاش لا؟؟؟
+
شكون لي مستافد من منع لاحتحاجات؟
+
شكون هو جيل لي مسمي راسوووو زييييد او زااااد
+
الصور
Mounir Mehimdate

عادل الزبيري
بغيت في لولو نقول واحد الهضرة باش نكونوا متفاهمين عليها، صبعان يدي ودماغي مدابزين، حيت وليت خايف، وخايف بزاف، خايف نكتب، وخايف نعبر، وخايف نخرج داك شي لي عندي في قلبي وضارني في خاطري

وحيت الهضرة على جيل جديد، خرج للمظاهرات لأول مرة فالشارع، آجي نتواصلو بالدارجة المغربية، بلغة تواصلية، باش كلشي يفهم، القريب والبع، ولعادي ولبادي

شكون أولا من مصلحتوا نجاح اي حركة احتجاجية، والناس تعبر على الرأي ديالها، ويتسمع صوتها، وتوصل المطالب ديالها للحكومة، لأن الاحتجاج والتظاهر حق مشروع، ولكن الناس لي خرجوا بزاف منهم طلعو فسطافيطات، حيت لبوليس ما باغيش الاحتجاجات ولا كاين قرار عملي بالمنع

المغرب هو أكبر دولة عربية تيوقع فيها الاحتجاج بشكل عادي، وديمااااا، لي كيعني أن الشارع المغربي مولف الاحتجاجات وتيشوفها عادية جدااا، فعلاش في 2025، شي حد ربما ما زال تيخاف من الاحتجاجات؟؟؟ وفاين كاين المشكل؟؟؟؟

أولا حاجة مزيان نفهموها كاملين، كاين نخب في لبلاد، مستافدة من وضع في لبلاد، تتشوف أن مشاريعها العملاقة غاديا تتضرر بسباب شباب مغربي او يافعين، مغرر بهم او لا، جاو يقولو كلمتهم، ويرفعو مطالب بأسلوب بسيط وتلقائي، ولي تيقول أن هذا لجيل مدفوع يورينا دليل على كلامو

انا كنظن ان سيدنا الله ينصرو، نجح في إخراج المغرب من زمن الخوف ومن زمن الحديد والنار إلى مغرب الاحتجاجات السلمية،لي قوات صورة المغرب في العالم، وخلات لكبار لي حاكمين كوكب الأرض، يشوفو لمغرب بعين مختلفة، أي الرباط مشات مزيان للمستقبل باحترام الحريات العامة

ليوم فلمغرب كاين إشكال هو ان لحريات لعامة ولحركات الاحتجاجية رجعان كتقول أن الأمور ماشي مريحة وان كاين تراجعات، وهذا كلام بان بلي عندو أساس من لحقيقة في الشارع العام المغربي ملي شباب نزل يحتج ولكن المنع كان قرار الدولة

بزاف ديال النخب المغربية، من سنوات قررات أنها تستافد وتقلب على لصالح ديالها، وتدفن راسها في الرملة، وتولي لبلاد بقرة حلوب، كانت مناضلة فواحد لوقت، استعملات النضال فحال سلوم، وملي وصلات، بدلت خطة اللعب

في المغرب، أدوات التأثير لقديمة في المجتمع ما بقاتشي، يعني الأحزاب والنقابات ووووو ولات موضة قديمة، ما قادراشي توصل صوتها ولا ان الزمان تبدل وهي بقات قديمة وبالية، وهاد لجيل جديد لي تولد وفتح عينيه على لانترنيت، خاص لي سمعو ولي يفهمو ولي يعرف يتواصل معاه

في لمدرسة، مازال في المغرب، كاينا لحفاظة وتمارين ديال الدار أو الفروض المنزلية، التلميذ كيرجع مسالي بتمارة ديال الدروس، وبشوية بشوية تذكره المدرسة، ومسؤول التعليم ناسي بلي هادا زمان فيه المعلومة فابور فلنترنيت، فشكون لي من مصلحتو لمغرب يمشي عكس اتجاه تكور البشرية في التربية والتعليم

أنا كنظن عدو المغرب اليوم هما دوك الانتهازيين والوصوليين لي شادين بلايصهم ومرتاحين وما كيديرو والو للبلاد باش تزيد لقدام، موالين لعام زين

أما بعدان ملي كنسمع لسيدنا الله ينصرو، تنسمع لملك تيبغي بلادوو وشعبوو بزاف، وباغينا حنا لمغاربة نمشيو بعيييد في التقدم، وهاد لملك الله يحفظوو، غير المغرب فسنوات لحكم ديالو بطريقة تستاحق نكونو حنايا طالعين ملكيين ونفتخر

كيفاش ممكن فمن الشبكات الاجتماعي والعالم لي دخل زمان الجيل الخامسيال لانترنيت، نقولو للعام أننا بلاد الحريات والإعلام الحر ووووو ومازال عندنا اشكال في التعامل مع احتجاجات سلمية قالوا فيها شباب أنهم باغيين الصحة والتعليم

اذا كان فعلا هاد الشباب عندهم مخططات ضد لبلاد، أنا من ناس لي غادي نكون ضدهم، لأن مصلحة المغرب فوق جميع الاعتبارات، أي المغرب أولا، وعاد شي لاخور، وهادي مسؤولية المؤسسات لي كتير لبلاد، تخرج تهضر وتوريني الحقيقة

المؤشرات الاجتماعية والاقتصادية في المغرب فيها نماري أي أرقام طالعين بزاف، ولي كتخلي لأسر في لبلاد خايفا على وليداتها وعلى غدا كيفاش غادي يكون

جيل زاد هم شباب ويافعين مغاربة تيشوفو لعالم من نوافد ديال لانترنيت يعني مرتابطين بكاع داك شي لي حاص في الدول البرانية، أي متبعين مزيان، فكيفاش ممكن المغرب يبقى قوي بالاحتجاجات ويشوفها مصدر تعبير عن الرأي ويسمع لكل واحد جا يحتج باش يفهم كل مسؤول واس لبلاد غاديا مزيان ولا لا

لكتابة بالدارجة المغربية ماشي ساهلة، لأن هاد لعامية فيها عاميات، ولكن غادي نحاول حتى نتعلم ونبدأ نكتب لهاد لجيل لي هو جاي وهو لي غادي غدا يكون في مراكز صناعة القرار

بغيت نختم من مشهد مغربي، نحاولو نشوفوه مزيان؛ كيفاش جيل يافع وصغير في السن تيرفع مطالب وعندو رغبة كيفنا قال، يشوف سبيطار ويشوف مدرسة حسن، وعندنا مسؤولين وصناع قرار حكوميين وإداريين في مستوى أعمار الأجداد، يعني المغرب عندو هوة كبيرة بزاااااف بين الأجيال اي سبب باش يتقطع الاتصال والتواصل