من التقاعد للمحروقات، واش باغي الأزمي المغاربة يخلصو الفاتورة مرة أخرى؟

من التقاعد للمحروقات، واش باغي الأزمي المغاربة يخلصو الفاتورة مرة أخرى؟

كتبها: المحلل الاقتصادي علي الغنبوري

في زحمة مناقشة البرنامج الحكومي داخل البرلمان، خرج السيد الأزمي باش يعطي الدروس لرئيسة الحكومة فالشجاعة والإصلاح، ودافع على تجربة حكومة بنكيران فملفين كيعرف المغاربة مزيان الثمن ديالهم، إصلاح التقاعد وتحرير المحروقات، ولكن قبل ما تنصح رئيسة الحكومة، خاصك السيد الأزمي تشرح للمغاربة شنو هي الشجاعة الحقيقية، وشنو الفرق بين إصلاح الاختلالات وتحميل المواطن وحدو الفاتورة، لأن الشجاعة ماشي هي تزيد على الموظف سنوات الخدمة، وترفع عليه المساهمات، وتنقص ليه من طريقة احتساب المعاش، ومن بعد تقول ليه راه هادا إصلاح ضروري، الشجاعة الحقيقية هي تواجه الاختلالات من الجذور، وتوزع الكلفة بالعدل، وتخلي كل طرف يتحمل المسؤولية ديالو، ماشي تختار الحلقة الأضعف وتخليها تخلص الثمن.

إلى كان السي الأزمي باغي يهضر على الشجاعة فإصلاح التقاعد، فالتاريخ فيه حقيقية ديال شجاعة الاصلاح ، منها تجربة حكومة عبد الرحمان اليوسفي، اللي واجهت ملف التزامات الدولة تجاه أنظمة التقاعد وواجبات المشغل، وخلصات الالتزامات ديال الدولة اتجاه صناديق التقاعد اللي ما تخلصوش منذ 1959، لأن الدولة ما يمكنش تطالب الأجراء بالتضحيات وتتهرب من مسؤولياتها، ونفس المنطق كينطبق على المحروقات، حكومة بنكيران حررات الأسعار وحيدات الدعم من صندوق المقاصة، ولكن بدون اي ضمانة ديال المنافسة الكافية لحماية المستهلك، أو خلات شركات المحروقات كتبورد على المغاربة بالعلالي، وهنا السؤال اللي خاص الأزمي يجاوب عليه، علاش كانت الجرأة فرفع الدعم على المغاربة، وما كانتش بنفس القوة فحماية المغاربة من اختلالات سوق المحروقات؟ واش الشجاعة هي تواجه الموظف والمستهلك، وتخلي الاختلالات البنيوية بلا معالجة كافية؟

الشجاعة السي الازمي ماشي هي تحݣر على العاملين وتحملهم نتائج الاختلالات بوحدهم، وماشي هي تطلق يد شركات المحروقات فالسوق بلا حماية كافية للمغاربة ، هادشي ما يمكنش نقدموه للمغاربة باعتباره نموذجا مكتمل للإصلاح، لان هادشي اللي درتوه في حكومة بنكيران عندو جوج ديال الحجات ، ياما هادشي كان تواطئ و يا اما بلادة سياسية، اما تسميه اصلاح شجاع فهذا يزكي طريق البلادة السياسية.